18Seven, Its A Way Of Life

من فتحت شركة فيفا بالكويت وانا محول معاهم .. تميت معاهم بالسراء و الضراء و الصراحه الشركه كل يوم عن يوم تفرق و تتحسن.. بس خدمتهم الهاتفيه عندهم حدها بطيخ .. المعلومات الي عند الموظفين كلها غلط بغلط ماعمري دقيت و عطوني معلومه صح.

والمشكله ان لما تسالهم يردون عليك بثقه تقول متأكدين 100% و اهي المعلومه 100% غلط .. الله يسامحكم..

قبل فتره كنت رايح دبي و دقيت اسال عن خدمة النت بالتجوال .. وقالولي في بو 5 دنانير حق يوم و في بو 30 دينار حق اسبوع.. المهم سالته خدمه بو 5 دنانير هذي 24 ساعه من وقت ما اشترك فيها ولا تبدي من الساعه 12 بليل الي 12 بليل اليوم الي بعده ؟! ..جان يقولي لا 24 من وقت ما تتفعل الخدمه .. قلت له متأكد قالي اي متأكد.. قلت له اكيد قالي اي اكيد.. و بعد ما اشتركت طلعت الخدمه من 12 بليل لي 12 بليل اليوم الي بعده .. متأكد طل بعينه .. وهذا السالفه طوفتها لان مالي خلق دندره..

بس ذاك اليوم صج عصبوني .. داق اسال عن الـ ” Call log ” بالاي فون  ليش بس يطلعلي مال يومين ؟! مع ان تلفون زوجتي فيه مكالمات 4 ايام تقريبا .. المهم ردت علي موظفه و بعد السؤال قامت تألف اجوبه .. انزين اذا ما تعرفين قولي ما اعرف او خل اسألك .. لا البنت طاحتله تأليف جبار . جان اقول لها ممكن تحولين لي لـ واحد ثاني يمكن يكون يعرف جان تحولني ..

الموظف الثاني الي كان اسمه “روماني سمير” حده موظف دفش وغير لبق وكنت احاول افهم شنو سؤالي بس الاخ موراضي يفهمني لان بباله الي بباله..  ويوم نرفزني على الاخر قلت له يحولني على المدير المناوب..

اول شي ما بغى يحولني بس اصريت و جان يحولني .. مدير الشفت كان راقي بتعامله و اسلوبه و هذي كانت الحسنه الوحيده في اتصلي ذاك اليوم .. بس بالنهايه عطاني معلومه غلط .. قالي ان : الاي فون سؤال كان بخط فيفا او غير فيفا بس يشيل مكالمات مالت يومين بس و هذي المعلومه غلط .. المعلومه الصح: ان الاي فون يشيل عدد مكالمات معينه وهي 100 مكالمه بغض النظر عن عدد الايام و طبعا اكتشفت هالمعلومه من النت ومو من فيفا ..

و بالنهاية اقول حق فيفا ثقفوا موظفينكم بالخدمه الهاتفيه ..