18Seven, Its A Way Of Life

اليوم الثامن: اعتقد بعد 7 ايام بلياليها قضينها في بوكيت بس استنفذنا كل الي فيها فقررنا نروح السوق بس السوق الصجي مو بسطات ..وعلشان نطولها سبحنا الصبح لي الضحى بالبحر و برشوت و موزا و تالي رحنى المجمع ..

المفروض هالمجمع اكبر مجمع عندهم واسمه Central Festival شوي دفعه عن “Patong Beach” فيبيلك تاكسي او سيكل… وصج المجمع عود و فيه كل شي بس الاسعار دبل مرتين عن البسطات .. فماشرينا شي يذكر غير الخماشيج مني ومناك .. بس في شغلات حلوه و تسوى..

بهالمجمع كان في مكتبه كبيره و لفت انتباهي الناس شلون تحب تقرأ وتبي تتعلم بس ما عندها فلوس تشتري هالكتب, تلقاها قاعده على الارض و تقرأ .. عاد جان اصور واحد منهم.. وكان في كذا شخص في كذا سكشن قاعدين بس يقرون .. اتمنى عقلياتنا تصير مثلهم في هذا الشي “حب القراءه” بس احنى الله يستر علينا مدللين و مدلعين.. والشغله الثانيه الي شفتها .. قصص الحب التايلنديه هههههه يحليلهم حاطين رسومات رياييل مغتره .. حركات والله ..

 وتالي رحنى مجمع ثاني اسمه Jungceylon Shopping Center عاد هذا قريب على فندقنا, مجمع كبير وفيه كل شي وحق التمشي احلى من المجمع الي قبله.. بس ارجع و اقول الاسعار غير عن البسطات لان البضاعه اصليه اما البسطات تقليد من امه..

اليوم السابع من رحلة تايلند المفروض نقعد مبجر لان ورانا رحله بحرية الى جزيرة جيمس بوند و هذا الرحلة راح تاخذ اليوم كله تقريبا لان راح نطلع من الفندق الساعه 9 الصبح و ماراح نرجع الا على 7 المغرب..

بس الشباب وين يقعودن الصبح بعد سهر الليل كله امس وما قعدوا الا حده حده و ما مدانا نتريق ولا شي

ركبنا باصنا و كملنا نومتنا لما وصلنا مرسانا ومنها ركبنا طرادنا.. و اتجهنا الى كذا جزيره مو على طول جزيره جيمس بوند..

الي اختلف بهذي الرحله عن رحلة جزيرة بيبي ان هذي الرحله يودونك مكانين تنزل فيهم و تجدف بالكاياك و سبحان الله على الطيبعه عندهم شي خيال و صج وناسه..

تالي ودونا جزيرة جيمس بوند ولان طرادنا كبير ما يصير يرسى على الجزيره فوقف بعيد وياخذونا بطراريد صغيره بس خوش طراريد كل طراد و طراد يفرق عن الثاني الي مضبط مكينته والي صابغه صبغه عجيبه و الي منيكل المكينه و الي مادري شنو .. حركات ..

عاد على الجزيره في اكشاك صغيره تبيع قلوب واكسسوارات وسوالف من هالقبيل تطمشنا عليهم ورحنا  افترينا الجزيره .. الجزيره مو كبيره بس فيها صعده و نزله والجو رطوبه يعني حدك تتعب .. بس حلوه الجزيره تستاهل تتعب فيها ..

وبعدها ودونا جزيره ثانيه ريحنا فيها وكلينا اناناس و همب و رقي .. الفاكه حدها باره تسرسح على القلبك خصوصا بجوهم الرطب ..  و بعدها رجعونا لي المينا و ركبنا باصنا و ردينا فندقنا ..

اعتقد في كذا رحلة لـ جيمس بوند وكل وحده تفرق عن الثانيه .. في شي بطراد سريع و في شي تمر على سوق بالبحر .. بس الرحله تسوى وتونس ..

بعد جم يوم من الرحلات، الكل تعبان و دايخ فكبرنا المخده اليوم و نمنا لي الساعه ١١ الضحى.

ويوم قعدنا رحنى تغدينا بقهوه دبي كالعاده و بعدها أجرنا تُوكتُوكين و قزو فينا بوكيت من بحرها لي مدينتها وحدها ضبطتنا صاحبت التُكتُك..

أول شي رحنى حلبت سباق سيارات Go Kart اول ما وصلنا عطونا انواع السيارات و سرعاتهم و اسعار تأجيرهم .. يعني اذا خذيت سياره cc نازل، سرعتها ماراح تكون ذاك الزود و تأجيرها راح يكون رخيص و كل ما زاد الـ cc زادت السرعه و فلوس التأجير بس بالنسبه لنا ما فرق سعر التأجير و كلنا كنا بنأخذ اسرع شي .. بس جان يقول الريال أي شي يخترب بالسياره راح ندفع فلوسه.. يعني تدعم شي و لا تدش بصاحبك ولا تسحك رصيف كله محسوب جان نهون عن السيارات السريعه و خذينا الي اقل منهم بدرجه يعني مسوين شي و سعر التآجير بـ ١٢٠٠ بات.

انا مو من عشاق السباقات و السيارات بس حدي حدي استانست و الكل مكيف لان الجو عجيب و الحلبه عجيبه و التنافس بالسباق بينا بس كان معطي السباق شي حلو..

ويوم خلصنا رحنا مضمار الرمايه .. وكان ودي ارمي بمسدس.. المهم رحنى و كان تقريبا كل شي موجود من فُرود بس الشوازن و الرشاشات ماعندهم زود و ما يبردون الجبد..

بس وناسه الترمي و الطلقات و الصوت و الفُرود شي شي .. ما ينلامون الناس لما تبي تسوي عصابات p( .. و كان معدل سعر الـ ١٠ طلقات بـ ٩٠٠ بات الى ١٠٠٠ بات حسب نوع السلاح.

ويوم خلصنا ركبنا التكتك و اتجهنا الى البنجي جمب ويوم وصلنا المكان روعه كله زرع و بحيره و كوخ صغيرون و شي على اصوله بس تكرمون الي يشتغل هناك **** واحد شايف نفسه و يتكلم من طرف خشمه و شافنا عرب وبغى يتفلسف علينا جان اتهاوش معاه ومشينا و رحنى مكان ثاني ..

المكان الثاني ما كان بروعة الاول بس يأدي الغرض و من اصل ٧ اشخاص نط ٤ … و بهالنطه عبينا ادرينالين صح حسافه باجي الربع مانطوا .. كلفتنا النطه ١٠٠٠ بات تقريبا.

يوم خلصنا قلنا نبي نرمي اطباق و نبي شوازن .. كويتيين مامنا فايده .. جان يودونا بالتكتك مكان ثاني بس شوي بعيد بس خيالي .. ما شاء الله الطبيعه عندهم فيها طفوح مو طبيعي ..

وصلنا و رمينا و طلعت انا و اخوي النقوشيين فيهم .. و بعدها ردينا فندقنا .. ريحنا و غسلنا و طلعنا نتمشي و ما يحلى التمشي من غير ما تاكل مانغا و اناناس  و بعد التمشي حجزنا رحلة باجر و ختمناها بقهوه دبي مثل كل يوم .. و تصبحون على خير ..

اليوم يوم راحه ماكو رحلة ولا شي يعني الي بنام ينام والي بيطلع يطلع و الوضع سعيد.. بس الكل ما يبي ينام و يبي يستانس, نبي نستانس من غير ما نباعد فماكو الا البحر الي جدام الفندق .

رحنى البحر ولا الموي شايل و الامواج عاليه و شكله السباحه راح تكون مليقه لان الوضع مو مال سباحه.. وبالفعل طلع اليال مو مال سباحه اليال حق الامواج و المناقز,, موجه ترفعك و موجه تجبسك.. و قزرناها مناقز على الامواج اكثر من 5 ساعات تخللها وجبات سريعه من الاناناس و المانغو والتشمس J و يوم بس خلاص تعبنا و فجينا أجرنا من على اليال الموزه والله لا يواريك 7 راكبين موزه ما يمديها تمشي الا طايحين و الشباب مو مقصرين استهبال.

صج هذا البحر الي يفتح النفس والي تقدر تنزل فيه.. لا ارض صبخه و طين ولا مُخَلفات مجاري و سموم ولا ريحه بانزين و جت سيكيات.. بحر نظيف و يال انظف – “حسافه على بحرج يا كويت” – اليوم صج ما رحنى رحله بس استمتعنا واحنى بمكانا و ما حسينا بالـ 5 ساعات.

وبسرعه سرعه تغدينا و شيشنا و ردينا الفندق لان المغرب راح نروح اشهر عرض عندهم الي تشوف اعلاناته كل مكان”Phuket FantaSea”.. وصلنا الباص الساعه 7 المساء تقريبا علما بان العرض ما يبلش الا الساعه 10 بس ماخذينا مبجر علشان نشوف المكان لان هذا العرض مو بس عرض مسرحي لا مكان فيه مثل مدينه فيها محلات و اكشاك و حركات مني و مناك و تصوير مع الفيله و الطيور و النمور.. المهم وصلنا هناك الساعه 7 ونص ودشينا و فترينا وصورنا و الوضع العام كان وناسه لان خوش ديكورات و المحلات تلاقي فيها تناتيف و خماجير حلوه و بعدها رحنى تعشينا في اكبر قاعه شفتها في حياتي, صج كبيره و مقسمه بترتيب و حاطين بوفيه خاص حق المسلمين “الاكل الحلال” بس الاكل ماكان حلوL.

وبعدها دشينا المسرح و الدخول كان مرتب على الاخر ما تقول ان اكثر من 1000 شخص داشين بنفس الوقت والعجيب في ترتيبهم ان محد يدخل معاه تلفون ولا كاميرا داخل المسرح ومع هذا ماكان زحمه.

بلش العرض بالوقت بس ماكان ذاك الزود مافيه اكشن يعني اذا انت دايخ ولا تعبان عادي تنام.. انا صراحتاً قمت اطقطق روس و شخرت شويه في اول 10 دقايق.. العرض فيه بعض الحركات البهلوانيه و نار و مطر وحتى حيوانات J بس كان بطيئ.

المسرح كان صج قوي صج صج قوي مو لعب بس الكراسي اسحملي اي شي ضيقين ما تعرف تقعد و منهرين من كثر الاستخدام..

تقييمي للعرض 4/10 بس تقييمي للمكان كامل من دشينا لين طلعنا 8/10 ويستاهل الزياره .. سعر التذكره كانت 1200 بات للشخص مع العشى .. مدة العرض ساعه من غير توقف.

و بهذا انتهى اليوم و تصبحون على خير.

اليوم الرابع : المفروض اليوم نقعد مبجر نفس امس علشان السايق راح ايينا بس الكل راحت عليه نومه من التعب و ما قعدنا على المنبهات الي مضبطينها الي قَّعدنا تلفون الرسيبشن يقول لنا السايق بره ينطركم .. الوضع كان طاش ما طاش علشان نغسل و نلبس و نطلع وما نتاخر على الرحله.. والحمدالله ما تاخرنا زود كلها 20 ديقيقه

 يوم وصلنا المرسى الكل يدور بقاله او مطعم او اي حد يبيع اكل .. الكل كان يوعان و زين لقينا ككاو و بيبسي و ماي ..

الطلعه من اوله لي نهايتها شي خيالي .. سبحان الله على الطبيعه من بحر و جبال و زرع و سما .. لوحه كامله سبحان من صورها ..

وبعد ما نزلنا في جزيره بي بي رحنى مكانين غيرها نسبح و نتشمس و ناكل اناناس و رقي و مانغا .. رحله حده قويه و ما درينا المرسى الا الساعه ٥ ونص ومن المرسا لي الفندق.

المفروض نريح بس الشباب مو بخاطرهم يرتاحون فغسلنا و بدلنا و طلعنا نسرح و نمرح في شوارع بوكيت ..

بعد الفحص و التدقيق ليلة امس لمدينة بوكيت قطاع بانغلوستير، ماشفنى فيه الا الفساد المطلق و بعض الاكشاك وقهوه دبي وجم شغله مني ومناك فققرنا ان نقضي وقتنا كله رحلات فـ ..

قعدنا في يومنا الثاني الساعه ٦ ونص الصيح علشان نتريق ونتزهب حق الرحله لان السايق بمرنا الساعه ٧ ونص و بعد ما مرنا خذانا درب ساعه و نص الي منطقة الشواذي عزكم الله ويوم وصلنا ولا العموم يبيع سبال و موز والشواذي ماكليتها ولعه اكل ببلاش و احني الي ندفع .. بس وناسه  وطماشه هالشواذي …

بعدها مشينا درب نص ساعه بالسيارة علي ما وصلنا الي البقيات فوق بالجبل وبين الشير (شجر) مكان صج خيال ، خضره دار مدارك و انهر و مجرى ماي من كل مكان و السما غيم و شي شغل عدل .. و قزينا بالبغيات نص ساعه و رديناهم مكان ما خذيناهم ، ركبنا باصنا و صعدنا الجبل اكثر حق البحيره الي يصب فيها الشلال علشان نسبح ..

الماي كان حده باره بس منعش على الاخر .. صوت الشلال و الماي يهدر من الصوب الثاني و الزرع تقول قاعد بفلم وماكان ودنا نطلع بس مضطرين نطلع علشان نركب الفيله ..

اما الفيله فلم .. السياس ملوت الفيله ميانين و ونسونا اكثر من الفيله .. بس ماطولنا مع الفيله يمكن تمشوا فينا بو ١٠ دقايق ورحنا محطتنا الاخيره الدرافت في النهر واهني كان احلى شي ..

النهر طوله ٩ كيلو و من اول ما نزلنا و لما وقفنا الوضع كله تجديف في تجديف و الحلو ان كنا قروبين وكنا نتسابق بس حده ضحك طول الدرب طيحات و رش مياها و صراخ علشان محد يسبقنى  بس للاسف ماكو وصور للدرافت … صج عجيبه هالرياضه شكلي راح اعلق فيها كل سفره اسافرها ..

وعلى الساعه ٦ تقريبا مشينا من الجبل الممتع و على ما وصلنا الفندق الا الساعه ٨ بس ما ارتحنا .. رحنى تمشينا في شارع بانغلوستيرت و بعدها قهوه دبي خذينالنا راس شيشه ..

يوم ممتع و رحله حلوه ..